ندخل بقا فى الموضوع علطول
جايبالكم النهرده طبق من عندى وبس
صينية الكبده بالبشاميل دلوقتى شايفه ناس رفعو حاجبهم وبيقولو ايه ده
صينية وكبده وبشاميل ايه العك ده
طيب استنو لما تعملوها وبعدين نتفاهم عشان انا محتاجه عينى دلوقتى
اشوف بيها عشان اكتبلكم الموضوع ده
اتفقنا
بلاش رغى بقا وهاتو ورقة وقلم
الى هنحتاجه اولا
1- أرز ( حسب عدد الافراد)
2- كبده (حسب عدد الافراد)
3- زيت وسمنه
4- بيض – ملح – فلفل – لبن سايل -دقيق ( للبشاميل)
الطريقة
بنسوى الأرز على النار
طريقة عمل الارز احتياطى برده نكتبها
اولا بننقع الرز فى ميا لغايت ما لون الميا يبقى صافى علشان نتاكد انه اصبح نضيف
وبعدين نسيح ملعقة سمنه كبيرة وعليها ذرة فلفل وشوية ملح (متكتريش) فى حلة الى هنعمل فيها الارز
ونحط عليه ماء بعدد اكواب الرز يعنى انا عمله 4 اكواب رز يبقى 4 اكواب ميا لحد ما تبتدى تسخن
ونحط عليها الرز( ملحوظه مهمه) لازم لازم الميا تغطى الرز مش تغطيه يعنى نغرقه لالالالا تغطية فقط لا بزياده ولا باقل
ولما تحسى ان الرز بدء يشرب الميا نشيله ونحطه على نار هادية ونقلبه ونغطى عليه لحد ما ينضج
كده خلصنا من الرز نسيبه على جنب بقا يبرد شوية
بالنسبة للكبده مش هنطبخها وهقولكم بعدين
فاضل البشاميل
طريقته سهله اوى
وبلاش بشاميل جاهز بجد بشاميل البيت احسن وانضف واطعم
نسيح السمنه (8 ملاعق)( العدد قابل للزياده حسب عدد الافراد وحجم الصينية )
نسيحها لحد ما تقدح
ونحط عليها الدقيق (7 ملاعق) ونقلب كتير وكويس اوى ولو السمنه قلت زودى سمنه بس مش كتير لحد ما يبقى لونه دهبى وبعدين نضيف اللبن لحد ما يبقى قوامه مظبوط يعنى بشويش متستعجليش عليه ونقلب لحد ما يطخن ونضيف ملح وفلفل ونقلب وفى الاخر نقفل النار وعلطووووووووول نجيب البيضه نضربها على الوش ونقلبها كويس
وجربو الطريقه دى انا بعملها علطول
دلوقتى فيه خطوة مهمه ناخد جزء مش كللللللللل جزء من البشاميل ونحطه على الرز الى عملناه ونقلبه كويس لحد ما البشاميل يوصل لكمية الرز بس مش كتير
والخطوه دى بقا مهمه اوى مش زى الى فاتت مهمه بس:confused1:
نقسم كمية الرز نصفين متساويين
ونجيب صينية العمل
ونحط عليها سمنه سايحه وعليها نص كمية الارز
وفوقها الكبده بتاعتنا واكرر مش مطبوخه لانها هتنضج فى الفرن مع الرز
المهم حطيناها وفوقها كمية الارز التانية وفوق خالص البشاميل
ونساويها كويس
وندخلها الفرن على درجة حرارة متوسطه لحد
ما تنضج والبشاميل الى فوق يبتدى يحمر مش يسود هه::confused1:
وبس خلاص
وبالهنا والشفا
واى سؤال انا موجوده
دى على فكرة من اكلاتى المفضله بعشقها
امى ربنا يخليهالى هيه الى علمتهالى
يالا اعملوها وقولولى رايكم بس بامانه الى تعملها تقول رايها
ولو عجبتكم عندى اكلات تانية
وكل سنه وانتم طيبين وبخير