يعني إفترقنا! ما تجي عنك أخبار؟
ودي أعرف ب غيبتي وش تسوين؟
ودي أعرف لضحكة القلب وشصار؟
وشلون لمّا للسوالف تحنين؟
للحين ضحكاتك نواوير وأزهار؟
للحين بسماتك بها برد تشرين؟
للحينها عيونك بها برق وأمطار؟
بعدك الا منه طرا البعد تبكين؟
للحينها تجرى تحت كفّك أنهار؟
وللحين وسط المحفظه صورة الشين؟
بعد الوساده تكتنز كل الأسرار؟
بعدك تصلي الشفع؟ وإلا تنامين؟
هي بعدها يدينك بها نور وسوار؟
هو بعده الدولاب حزن الفساتين؟
أحمر شفاتك ظل في لونه النار؟
إذا بهت مثل الزمن لا تقولين!
بعد الشدو يعمل على عينك حصار؟
باقي حزينه "بكلتك" والتلاوين؟
باقي الحمام اللي على ليل وجدار؟
للحين يبكي لك وإنتي تغنين؟
باقي عصافيرك على نفس الأشجار؟
هي نفسها «الركوه» ونفس الفناجين؟
للحين باقي لي معك اي تذكار؟
عطري بقايا ساعتي والدواوين؟
شفتي افترقنا وين ودتنا الاعمار!
شفتي كبرت وصار عندي بزارين
ما عدت أدور لجل أراضيك أعذار
ماني مصدق صار عادي تغيبين
الله يسهّل لك مشاوير وأسفار
وتفتح بوجهك وين ما أنتي تروحين
وقولي عشقني بس خانته الاقدار
والا اتركيها واسكتي لا تقولين
لحظة ذكرتك طاح عن وجهي ستار
وقمت اتذكر ضحكتك من تمرين
فراق عادي ما أبي غير الاخبار
نفسي أعرف بغيبتي وش تسوين؟