الكريم بروليه ()

إخواني و أخواتي الأعضاء الكرام

اليوم رح أعطيكم طريقة سهلة كتير لتحضير نوع حلويات كتير لذيذ

المقادير

1- ليتر واحد كريمة حلوة (( سائلة )) غير مخفوقة و البودرة ما بيمشي حالها

2-(( 3 )) بيضات كاملين مع (( 5 )) صفار بدون بياض

3- 50 غرام سكر

4-فانيل ظرف واحد وإذا كان الفانيل مركز بتكفي ملعقة طعام واحدة ممسوحة مسح

5-نشاء مذوب بالماء

6- خشاف الدراق أو ما يقال له في السعودية الخوخ (( معلب ))

الطريقة

أول شيء نضع ربع ليتر من الكريمة في إناء مع البيض كله والسكر والفانيل ومنخفقهم منيح

بعدين

نضع الكريمة الباقية بالعلبة في قدر ونضعه على نار هادئة ونقوم بالتحريك المستمر

بس شفنا الكريمة ارتفعت لفوق شوي بسرعة منضيف الكريمة المخفوقة مع السكر والبيض والفانيل وأثناء الإضافة لازم نبقى عم نحرك حتى ما يجمد البيض (( هيك بينتزع كل شغلكم ))

بعدين منضيف النشاء وكمان منتابع التحريك حتى يصير سميك متل المهلبية أو أكتر شوي
(( اللي ما بيعرف طريقة المهلبية يقلي ))

بعد هيك منقوم بسكب الكريم بروليه في صينية صغيرة بحيث يكون سماكة الكريم فيها لا تتجاوز (( 1 )) سم أو واحد ونصف سم

بعدين منقوم برش القليل من السكر على الوجه ومندخلها على فرن منكون مشغلينوا من قبل حتى يكون حامي

وبس تاخذ اللون الذهبي منطلعها من الفرن لكن لازم تنتبهوا لازم تكون الحرارة من فوق بس
و هذا الكريم بينحرق بسرعة فلذلك لازم تنتبهوا

و آخر شي منقوم بتقطيع خشاف الدراق إلى شرائح و منفرشو على الوجه ومنقوم بتقطيعها على شكل مستطيلات أو حسب الرغبة

بتقدرو تضيفوا صلصة المانغو أو الفراولة على الوجه

وبتقدروا تضيفوا قطعة بسكويت على الوجه كمان

صلصة الفراولة والمانغوا بتلاقوهم جاهزين بالسوق

وان شاء الله عما قريب بكتبلكم طريقة تحضيرهم بالبيت

ملاحظة :: بيجوز إذا ما لقيتو كريما حلوة سائلة استعملوا الكريمة المالحة (( بتصير ))

بس لازم تزيدوا كمية السكر إلى 150 غرام

ملاحظة تانية :: بتحسنوا كمان تضيفوا الدراق المقطع الناعم إلى الكريم قبل ما تنزلوه عن النار

ان شاء الله ألف صحة وعافية